政情：林鄭生日美孚小業主贈慶
有「好打得局長」之稱嘅發展局局長林鄭月娥五十四歲喇！佢今個禮拜五生日，一班美孚新邨嘅小業主尋日卻事先張揚，話到時會帶埋大大個生日蛋糕同生日卡去政府總部，為林鄭生日贈興兼賀壽喎！
班小業主咁有局長心，賀壽係其次，踩場示威反地產霸權至係真正目的。美孚新邨第八期隔籬石油氣庫原址變住宅嘅風波，發展局多次發稿解釋係獨立項目，冇損害美孚小業主權益，但小業主反指當局係以謊言遮掩錯失同推卸責任。
呢班小業主曾發動千人瞓街，又好幾次去原發展商旗下嘅珠寶店示威，都算係少少激進，加埋新發展商入稟禁制居民阻地盤動工嘅官司，啱啱好喺禮拜五朝早開庭處理發展商民事索償，究竟居民嗰日下晝會點樣同局長「慶祝」？大家拭目以待啦！