政情：女長毛嚇窒德成局長

「女長毛」雷玉蓮信佛四十年，尋日係佛誕，佢都去咗由香港佛教聯合會主辦嘅浴佛大典，不過女長毛現身點會只係參加浴佛大典咁簡單？同場出現嘅仲有民政事務局局長曾德成等嘉賓，女長毛着住件DIY印有內地著名維權藝術家艾未未肖像嘅短袖衫，特登坐近走廊位，目標似係想嚇窒德成局長。

女長毛着住件白色艾未未Tee入場後，為咗畀出席活動嘅主要嘉賓見到，特登揀咗個近嘉賓進場嘅走廊位坐低，儀式期間，其他信眾雙手合十時，佢就攤開雙手。不過班官員都好似唔係好睇到佢，直到儀式完咗，嘉賓們離場時經過女長毛前，女長毛彈起身企定定喺佢哋面前，大家面對面唔夠一呎，德成局長等當堂愕晒然被嚇窒。不過話晒都係浴佛大典，女長毛冇好似平時咁盡情衝擊，不過就話︰「嗰時我諗，你哋都有今日喇！」

其實女長毛做咁多嘢，都係因為尋日係艾未未刑事拘留期限屆滿嘅日子。