政情：張炳倡限內地客揮金

小香港近年面對一個大煩惱，各行各業都面對內地如洪流嘅資金衝擊，炒樓、孕婦逼爆產房甚至奶粉荒、藥油賣斷市等，港府一直束手無策，日前行政會議有成員拋出考慮是否修改《基本法》防內地夫婦來港生育嘅建議。尋日行會成員兼消委會主席張炳良講到奶粉搶購潮時都建議，政府有需要考慮係咪制訂境外人士喺香港消費嘅限制，咁即係暗示可限制內地客湧港搶購物品嘅數量，唔通行會已經意識到要適當閂吓小香港嘅閘？

本港出現奶粉荒多時，甚至滋生犯罪集團倒賣奶粉，內地孕婦又逼爆本港產房，內地需求已為本港帶嚟壓力。本身研究公共行政嘅張炳尋日出席一個電台節目時解釋，香港已經成為一個全國性嘅市場，內地唔同省市居民都可以自由來港購買唔同種類嘅貨物，深港兩地來往頻繁，喺咁大需求下，好容易對本港居民日常貨品嘅供應帶嚟負面影響。

奶粉係產品需要，醫療卻係服務需要，張炳直言，公立醫院必定會以本港居民為優先，私家醫院雖然未必受到限制，但若內地消費者大量需求本港嘅服務同貨品，令供求失衡時，港府最終仍要解決供需問題，並考慮係咪要為境外人士喺香港消費制訂限額。

政府無視民間警號

佢拋出呢個建議既代表消委會立場，亦係一個行會成員對內地需求壓倒本港供給嘅關注，加埋早前有行會成員要求研究包括修改《基本法》在內嘅方法杜絕，可見本地政圈已經關注到內地各種需求帶嚟嘅致命壓力。

民間其實早有聲音對內地資金炒賣香港房屋、水客搶購本地奶粉發出警號，但港府遲遲唔理，任由家長飽受撲奶粉之苦，無殼一族則望樓興嘆，依家唔止一個行會成員提出制衡辦法，港府冇得再拖喇啩！