政情：搞搞政：德成局長充闊佬懶理露宿者
由東亞運混帳醜聞、關愛基金爛尾到國民教育洗腦，民政事務局局長曾德成成為眾矢之的，尋日又有議員借勢鬧爆佢。
立法會福利事務委員會尋日討論露宿者問題，社會福利署同醫院管理局都有派人出席，但唔見同樣有關嘅民政事務局官員，社民連議員「長毛」梁國雄好不滿，質疑德成局長掛住搞東亞運同關愛基金，當啲露宿者、關注團體同福利委員會冇到，又話：「曾德成應該嚟又唔嚟，我今日原本整咗副棺材掟佢，但佢冇嚟，我下次就要掟佢！」
長毛又話，德成局長擅自將逾千萬元東亞運盈餘捐出去，其實將呢筆錢用喺露宿者上，佢哋嘅生活已能大為改善：「依家（全港）露宿者有一千人，一人一萬蚊咪又係一千萬，曾德成要搵啲五無人士就喺晒呢度！」咁即係話德成局長寧願做大花筒，都唔願意幫啲露宿者搵張床瞓。
設計圖片