政情：鬍鬚曾冷待建制派飯局
建制派立法會議員早前萬分唔情願咁投票支持史上最廢嘅預算案，對嚟緊區議會選舉嘅影響，真係啞子吃黃連，有苦自己知！搞出呢份預算案嘅財爺鬍鬚曾尋晚現身建制派嘅定期飯局，畀面出席嘅議員得二十個左右。有議員私下直言係明知鬍鬚曾廢廢哋，令唔少人死心杯葛飯局。
好似工聯會嘅黃國健喺開飯前，已表明會追問鬍鬚曾幾時派錢；建仔嘅陳克勤亦講到明係為咗加車稅而嚟。結果個半鐘左右，鬍鬚曾同一眾議員已前後腳鬆人，明顯係話不投機半句多。
有議員爆料，話唔少人質問鬍鬚曾幾時派到錢、點樣定義十八歲條界線等，不過佢都講唔出，淨係識得講會喺七月去立法會攞錢。其他議題好似加車稅豁免、置安心可租可買等，佢都係交白卷兼耍太極，話會向相關局長反映。
鬍鬚曾兩手空空出席建制派飯局，右為佢嘅政治助理葉根銓。