政情：政府推許曉暉做白老鼠

舊年高鐵事件鬧得滿城風雨之際，運輸及房屋局特意開設一個facebook戶口邀請網民留言，由局長鄭汝樺直接回應，但劣評如潮。事隔一年，曾班子嘅施政繼續連番失誤，但特首辦「上亞厘畢道」fb喺呢個禮拜五傍晚七點正，再搞番個名為「時事Q&A」嘅官民網上對話，為時四十五分鐘。唔知係咪見過鬼怕黑，頭炮竟然搵嚟知名度較低嘅民政事務局副局長Florence許曉暉，仲話要同網民探討社企發展喎，齋聽呢個組合經已悶到瞓着。

據聞，政府原本屬意搵勞工及福利局局長張建宗打頭炮，親自回應坊間對最低工資嘅種種疑問，奈何相關議題近月喺社會嘅爭議愈嚟愈激，佢哋擔心張建宗最終不敵網民，引火自焚，就扑低咗呢個建議，千揀萬揀下改派Florence做白老鼠。

政府又計劃喺網上諮詢當日，安排主持抽讀網民對社企發展嘅疑問。話到明抽讀，一啲政治不正確嘅提問自然隨時被河蟹，熱心網民屆時可能只能夠留言。