政情：王冬勝獲歐智華器重

滙豐控股尋日公布今年首個季度經營狀況，焦點都聚喺行政總裁歐智華身上，佢同傳媒傾業績狀況時提得最多嘅人名，唔係主席范智廉，亦唔係自己個名，而係滙豐亞太區行政總裁王冬勝（Peter）。

傳媒同投資界好關心滙控亞太區業務，歐智華每每回應幾句後，都會補句「詳細資料等Peter Wong遲啲補充」，可見對Peter相當器重。咁又係，滙控首季稅前盈利，亞太區佔咗逾65%，加上Peter對亞太區業務瞭如指掌，當然成為歐智華左右手。

今次係滙控破天荒以季度形式公布咁多經營狀況，但美中不足就係份「經營狀況聲明」中譯本錯漏百出，例如第四頁「資產息差」寫成「資產息產」；最離譜係第六頁「除稅後利潤」寫成「除稅前利潤」。

仲記得舊年滙控派中期業績時，份業績中譯本都有錯漏，其中講派息政策嘅翻譯明顯有差異，搞到公關姐姐漏夜打畀我哋澄清。滙控業務出咗名多，覆蓋國家又多，涉及好多數字，要做到百分百無誤真係要打醒十二分精神至得。