政情：希慎小股東罕有互片
希慎尋日召開股東會，有小股東好踴躍提問，本來係好事，點知就令一啲小股東不滿。
事緣有位小股東向管理層提出關於公司嘅債務水平同匯兌風險等問題，喺連環發問後，另一位小股東火起，唔滿意該名小股東獨霸發問時間，又嫌佢嘅問題雞毛蒜皮兼浪費時間，隨即兩人互片，更有其他小股東加入罵戰，連新任非執行主席利蘊蓮都冇符，最後要勞煩在場嘅工作人員維持秩序，先至擺平事件。
類似嘅情況喺其他股東會亦有發生過，但係喺希慎就較為罕有，以往嘅股東會，希慎小股東多數都係有讚冇彈。經了解後，連環發問嘅小股東只係關心公司嘅未來發展，而唔係專登踩場。
此外，希慎喺銅鑼灣嘅新場—希慎廣場，雖然要下年至開幕，但管理層就話會引入本港依家較少有、甚至從未進駐嘅商戶，相信到時又多一個「血拚」嘅地方嘞！
小股東罵戰，希慎新任非執行主席利蘊蓮都冇符。