政情：唐唐縮骨閃閃閃

關愛基金慘變爛尾基金，民政事務局局長曾德成上禮拜喺財委會上，因承認基金籌款至今遠未達標被議員狂轟，更令有關撥款要押後至禮拜五再表決。

身為基金督委會主席嘅政務司司長唐唐本應出席禮拜五嘅財委會，解答議員嘅質詢，但佢因出訪四川而避過一劫，令德成局長、常秘楊立門同基金執委會主席羅致光等人硬食議員嘅責難；加上德成局長當日強硬表明基金唔係配對基金，同唐唐早前話基金「係同商界配對」嘅言論唔對嘴，各黨議員近日都公開促請唐唐唔好再龜縮，主動出席呢個禮拜嘅財委會解畫。

對於議員嘅訴求，唐唐一於少理。聽講佢已計劃禮拜五起休假四天，赴美出席囝囝嘅畢業禮，意味呢個禮拜加開嘅財委會又係得番德成局長等人受靶。唐唐再次避過議員圍剿，真係夾都冇咁啱。

唐唐嘅新聞秘書尋日強調唐唐唔係有心逃避，直言基金本來計劃喺上禮拜申請撥款，冇人預計會押後，而唐唐作為爸爸，去見證囝囝畢業係好合理喎。

林鄭運路速閃被噓

關愛基金被踢爆籌款反應冷淡後，連日嚟都係得羅致光就事件拆彈，班官好似事不關己咁，唔知去晒邊。其實唐唐作為基金最高負責人，若果佢明知呢個禮拜去唔到財委會解畫，係咪都應該喺呢幾日出嚟公開回應事件，向公眾交代吓呢？否則，公眾除咗覺得佢不負責任，亦難免認為佢係有心避開呢個政治炸彈。

除咗唐唐，發展局局長林鄭月娥尋日喺一個建築界活動擔任主禮嘉賓，亦被大批傳媒喺場地正門等候，希望佢交代吓丁屋僭建理順計劃嘅最新進展。發展局嘅新聞官同有關活動嘅工作人員喺林鄭離場前特地向記者打聽會問乜嘢問題，又特意架起記者區，千叮萬囑記者唔好追出去。

點知等咗一陣，工作人員竟突然宣布林鄭已循另一出口離開，唔少記者頓時覺得被騙，噓聲四起。林鄭素來有「好打得局長」之稱，何解今次要搞到運路速閃咁縮骨呢？