熱帶語林：香港多的是疑似拉登

雖說香港樓價實在太昂貴，希特拉都買唔到樓，恐怖分子未必有本事藏身此地，然而根據頭號通緝犯匿藏巴基斯坦的隱居模式來看，香港多的是疑似拉登。

先看看正牌拉登的隱居模式：不倒垃圾，沒有電話，沒有上網，窗戶極少，嚴禁訪客。

好了，且來訪問一下香港其中一位疑似拉登──

「阿伯呀阿伯，點解你屋企冇人倒垃圾？」

「噓，傻仔你冇睇新聞咩？最低工資法例生效咗啦嘛，管理公司為咗縮皮，炒晒所有清潔工人咯！」

「咁點解你屋企又冇電話？」

「實不相瞞，我咪係其中一個被炒魷魚嘅清潔工人囉，工都冇得開咯，邊有錢交電話費呀！」

「你好似都冇上網，原因係乜？」

「上網？乜嘢嚟㗎？唔好玩我哋呢啲窮等人家啦，上吊我就知係乜！」

「你屋企係咪好少窗㗎？」

「唔係少，而係冇，爛鬼籠屋板間房通常都冇窗㗎啦，唔窒息都偷笑。即使有窗都唔敢開，怕自己窮到燶諗唔通，沊一聲跳鬼咗落去！」

「阿伯，可唔可以畀我入去參觀一下？」

「傻仔你真係傻得交關，裏面污糟邋遢成個亂葬崗咁，我身為住客都唔想入去，你參乜鬼嘢觀呀！」

跟保安極度嚴密的正牌拉登最大分別乃是，疑似拉登居住地點是沒有看更的，最低工資法例實施之後也炒掉了。