貴州省尋日喺本港搞咗個招商推介會，場中竟然有多個矚目人物，最省鏡嘅應該係貴州省委書記栗戰書千金栗潛心。長髮大眼、氣質清秀嘅栗潛心喺本港任職投資銀行，佢雖然唔係貴州人，但都抽空出席貴州省嘅活動，梗係間接撐阿爸喇。
貴州省政協嘅菁英會創會主席施榮忻，及身兼百仁基金創會主席嘅恒基地產副主席李家傑都現身，佢哋同栗潛心有講有笑，原來栗潛心十個月前加入菁英會做執委，唔怪得大家咁多嘢傾。
栗潛心（中）巧遇施榮忻（左）同李家傑（右），言談甚歡。
