政情：搞搞政：周總送花阿婆照鬧港鐵

上市公司負責人每年都要面向股東，除咗交數有壓力，點樣應付各色小股東嘅挑戰都係藝術。港鐵尋日舉行股東會，行政總裁周松崗就做咗完美示範，事關每年都反轉港鐵股東會嘅小股東退休校長陳婆婆又出招，送咗丈夫著作《標點符號研究》畀周松崗做離任禮物，周松崗都不弱，即時奉上一束鮮花，一於你送書香，我送花香，冧到陳婆婆直呼：「我要暈喇！」

去年陳婆婆狂鬧港鐵孤寒，股東會連餅都冇得食，或者係咁，港鐵都早有準備，只見答問環節時，陳婆婆又是第一個舉手發問，港鐵主席錢果豐賣口乖話：「陳校長，早晨！」但陳婆婆一啲都唔受落，話唔好咁樣叫佢喎。台上嘅錢果豐又話要禮尚往來，由周總獻上一束鮮花致謝。

暈得一陣陣嘅陳婆婆好開心，但佢講完心之後，冇耐都要數落港鐵孤寒，話對港鐵提供畀長者嘅兩蚊車程優惠好失望，事關限時限候，相反深圳日日都有優惠。陳婆婆又話，下次股東會應該安排喺有長者優惠嘅星期三舉行，或者送免費車票畀出席嘅小股東喎！