政情：改例趕激進派 泛民再爆內訌

立法會激進派嘅抗爭愈演愈烈，搞到周不時開會都秩序大亂，唔係掟蕉、掟膠樽就係掟陰司紙，搞到市民不滿，議會民望插水，立法會議事規則委員會早前決定執吓啲規矩，擴大小組委員會主席嘅權力，等佢哋都有權趕啲問題議員離場。尋日泛民舉行飯盒會，以白鴿黨「鐵頭仁」何俊仁同公文袋「袋巾傑」梁家傑為首嘅成員都同意驅逐不檢點議員離會，但就唔支持規管發言冗長、拉布嘅行為，難怪有人認為泛民此舉只係針對長毛、大舊等激進行動，嚟緊十一號，泛民分分鐘又爆窩裏鬥。

早排立法會人力事務委員會討論跨區交通津貼，「長毛」梁國雄公然喺會中向勞工及福利局局長張建宗掟膠樽，雖然掟唔中，但都引嚟好多市民不滿，加上其他前科，終於搞出執吓規矩嘅建議，以便小組委員會都獲得現時立法會主席根據《會議規程》第四十五條享用嘅部分權力。

唔准掟嘢准拉布

尋日飯盒會討論呢個問題，會後基本同意授權小組委員會主席有權裁決議員開會時若行為極不檢點，可命令其立即退席。不過，佢哋就唔支持規管議員拉布，發言冗長。據悉，反對兩項規管嘅僅有兩個泛民人士。嚟緊十一號，立法會就會正式討論呢個擴權決定，屆時長毛等誓會為掟嘢權辯護，議會中人都估計一場泛民互插好難避免。

自從長毛、大舊同毓民退出泛民飯盒會後，佢哋同泛民主流派嘅溝通渠道再少一個，加上社民連同人民力量又分崩離析，依家要搵泛民嘅共同意見真係愈來愈難，今次議事規則委員會嘅建議就可見一斑，泛民之間風風雨雨，對相關政黨同立法會嘅民望毫無好處，啲議員真係應該從大局着想！