房署鐵腕趕絕街市違例檔

【本報訊】審計署早前發表報告炮轟房屋署管理商場街市不力後，房署即嚴厲執法，加強掃蕩違規佔用通道的檔戶，有葵盛西街市檔戶批評房署矯枉過正，「日日都派幾十人嚟掃場，搞到啲檔戶冇啖好食。」檔戶要求房署「畀條生路」，不要嚴打。不過，房署發言人表示，該街市檔戶罔顧租約規定，屢勸不改，揚言會繼續一日三次巡查，絕不手軟。

日日掃場 冇啖好食

葵盛西街市商戶大聯盟昨召開聲討大會，不滿房署近期日日「掃場」，滋擾該邨的街市／商戶，扼殺小商戶的生存空間，強迫商戶結業，罔顧居民需要。葵青區議員梁玉鳳表示，葵盛西街市只有十多個檔戶，一直相安無事，但自審計署早前批評房署管理商場街市不力，任由檔戶將檔位改作其他用途及佔用街市通道後，房署即日日派員到街市「掃場」，勒令檔戶將貨品放回檔位又發警告信，令檔戶「冇啖好食」。

梁表示，葵盛西邨已有數十年歷史，街市檔位全部只有數十平方呎「豆腐膶咁大」，難以要求檔戶將貨物全部搬回舖內，「個賣魚檔話如果要將啲海鮮全部搬返入去，佢連劏魚嘅地方都冇！」檔戶希望房署可手下留情，酌情處理檔戶的要求。

不過，房署昨日回應時採強硬態度，指有關租戶隨處放置雜物、霸佔公眾地方、嚴重阻塞消防通道、污染街市環境，更於商舖檔位內打麻雀等，因此房署上月二十九日起，每日派出特別事務隊糾正商戶違規行為，每日早、午及晚各一次，直至商戶完全糾正違規行為為止。