政情：四叔拒評股怕言多必失

恒基地產主席「四叔」李兆基尋日喺長子恒基副主席李家傑（Peter）陪同下，出席喺中華總商會俱樂部舉行嘅聚會。四叔一向豪爽直言，尋日卻講兩句就封嘴，佢話有朋友提醒佢：「（人）天生兩眼兩耳一口子，叫人多見、多聞而少言，言多必失就係呢個理由。」所以四叔一於決定講少啲嘢，費事「言多必失」。

四叔尋日以香港培華教育基金會主席身份同傳媒聚會，佢例牌講吓樓市、股市。樓市方面，四叔話，政府主動推售地皮，可彌補以往供應不足，恒基作為發展商，對每幅土地都有興趣。家吓豪宅就好似鑽石，再貴都有人買。至於普通住宅市場，因政府增加供應，相信樓價會平穩發展。問到股市走勢，四叔就好鬼馬咁話自己冇香港證券分析牌照，不便推介股份。

難得見到Peter，梗要追問佢三個BB嘅近況啦，佢笑住推搪話：「唔好講BB嘢啦！好複雜！」咁買BB奶粉有冇難度？佢笑稱：「梗係冇啦！」見佢一副有子萬事足嘅冧樣真幸福。