政情：搞搞政：新立會大樓餐廳冇人敢做

立法會為咗新大樓入伙期煩咗一輪，近排秘書處又有一個新煩惱，事關新大樓內嘅餐廳冇人肯投標營運，行管會將喺下禮拜二討論，好可能要放寬標書限制再次招標，依家要修改標書，重新招標。一手一腳處理新大樓入伙事宜嘅秘書長吳文華想唔頭大都難，如果冇人入標，立會餐廳開業無期，第日秘書處咪要做埋嗌外賣、call到會嘅工作？

立會新大樓地下設有一個千九呎嘅餐廳，專畀班議員、秘書處職員同記者醫肚，上月進行招標，曾經有三間公司向立會申領標書同聽取秘書處簡介，但到月底截止都冇人正式入標。有份處理招標工作嘅立會行政管理委員會成員李華明估計，承辦商係擔心「冇肉食」而唔肯入標，例如有一間公司就誤以為可以喺餐廳內做喜宴酒席，知道唔得後就放棄，而且標書列明嘅條件多多，好似餐單咁，奶茶就規定要賣八蚊杯，如果想加價又要秘書處批。

依家通脹殺到，各類食材不斷加價，加上最低工資條例，市面啲平民餐廳都做唔到一杯奶茶賣八蚊啦，何況係位於中區嘅立會新大樓餐廳？