政情：中策組無聊民調嘥公帑
中央政策組美其名係政府智囊，做嘢卻好鬼祟，政制及內地事務局局長林瑞麟尋日承認中策組曾經做過高官係咪要下台嘅民調，隨即惹嚟一班泛民主派議員翻舊帳，踢爆中策組曾經做嘅民調問過「李柱銘係咪漢奸？」、「陳方安生係咪忽然民主？」等，力斥佢哋嘥公帑，淪為煲呔曾嘅政治機器，不如早啲解散。又係嘅，與其做埋啲「阿媽係女人」嘅民調，慳啲公帑好過啦！
白鴿黨嘅涂謹申尋日爆料，話從知情者口中得知，中策組曾經做過有關李柱銘係咪漢奸、「民主阿婆」陳方安生係咪忽然民主等民調，究竟呢兩項民調關政府制訂政策乜嘢事呢？林公公回應時冇作否認，淨係死撐唔評論揣測性報道喎。
袋巾傑隨即狠批中策組不務正業，新民黨主席葉劉淑儀更形容做民調「非常無聊，無乜意思」。