政情：舊招抗通脹虎　鬍鬚曾累街坊

今年以來，衣、食、住、行、柴、米、油、鹽幾乎樣樣都話加，但政府公布嘅首季甲類通脹數字都只係百分之四點一，惹嚟學術界同市民好多質疑。財政司司長鬍鬚曾尋日喺立法會回應質詢時終於鬼拍後尾枕，承認甲類消費物價指數中食品同水電煤都高近百分之七至百分之九。都話通脹猛於虎啦，鬍鬚曾尋日似乎有意扮打虎英雄，可惜佢只係將預算案公布嘅措施再播放一次，睇佢嘅架勢，撲虎不成，分分鐘連累港人葬身虎口！

鬍鬚曾尋日喺立會書面回覆質詢，明言嚟緊嘅十三號，政府就會調整全年嘅通脹預測，呢一着無疑係為佢哋喺預算案中低估通脹做粉飾工程。佢跟住大數政府喺預算案宣布嘅措施，話四、五月之間，政府各部門會就預算案嘅多個建議展開前期工作，只要財委會通過相關撥款，港人就可以喺七月一號享受電費補貼；八月同九月，公屋居民又可以獲得代繳租金。

特區官員難寄予厚望

至於向港人派發六千蚊嘅措施，亦密鑼緊鼓進行中，銀行界早前已放風話十月底至十二月底之間。換言之，政府營造嘅聲勢就係，由四月到十二月，各種紓困措施會排住隊登場！

不過，鬍鬚曾羅列嘅呢啲措施，全部都係預算案嘅舊招，連一直冇任何進展嘅通脹掛鈎債券都只係再寫一次，毫無新意嘅翻炒舊料，難為佢可以堂而皇之咁攞嚟搪塞立法會議員。雖然佢再三強調，政府會繼續密切留意通脹嘅走勢，並因時制宜咁制訂適當嘅措施，緩解市民喺高通脹下嘅生活壓力。不過，通脹從來易放難收，以鬍鬚曾同特區政府嘅治港本領，香港人都唔敢寄予厚望。