政情：發叔父子馬場贏大錢
雖然身兼行政會議成員兼新界鄉議局主席嘅劉皇發因早排漏報利益搞到一身蟻，係咪可以冧莊做鄉議局主席又現暗湧，但喺尋日沙田馬場嘅賽事，數全場最happy嘅非發叔莫屬。佢個仔劉業強首次派名駒「驌龍」上陣第一場，竟以半冷姿態勝出，袋逾三十六萬元獎金，發叔又中埋連贏位，袋多兩萬元。
「驌龍」呢個名好少見，係咩意思呢？發叔解畫話「驌」同「肅」發音相同，古代有典籍提及「驌驦」，即係良駒駿馬咁解，「驌龍」呢個名，係阿仔劉業強改嘅。翻查資料，發現「驌驦」呢個詞語，最早出現喺春秋戰國時代，睇嚟劉業強有啲文彩噃！