早前捲入鄉委會賄選案嘅冠軍練馬師「食力簡」簡炳墀，心情似乎未受影響，尋日佢照舊擔住大雪茄現身馬場，表現一樣咁風騷。
佢話喺五十年代已迷上呢種玩意，可惜當年收入唔多，直至做咗練馬師，食雪茄至可以真正成為嗜好。佢後生時每日吸好多支，最愛古巴出品，貪佢煙味濃醇芳香。依家年紀大咗，每日只食一至兩支。
時移世易，雪茄口味款式推陳出新，但佢發現新不如舊，仲慨嘆部分商人急於將雪茄推出市場，太嫩嘅煙絲亦被採用，失卻原來香醇味。佢曾向煙草商反映不滿，但最終都冇用。
食力簡買埋防潮箱珍藏心愛雪茄。
