Sun角度：毒品多術語避耳目

「去唔去『飲嘢』？」「飲唔飲『可樂』？」汽水大家飲得多，但此「可樂」非彼可樂，而是可卡因的術語。為了低調行事，不法之徒為各類毒品冠上別名，娛圈中人亦用該堆術語做交易，更會相約上遊艇搞Ｐ「開飯」，以避耳目。

「食可卡因或大麻，分別有一陣濃烈嘅燒膠同燒草嘅味，好易聞得出，出海就容易散味，最重要都係容易『散貨』，有咩『依郁』即刻丟晒啲貨落海，乾手淨腳。」接近娛圈的消息人士更說，吸毒藝人現在視上遊艇開P為最穩陣的鐵竇。

Kelly音近被「拖落水」

而進行交易或「開飯」時，亦會用術語做暗示，可卡因的單位會稱作「一滴」，每滴可混入兩至三支煙內的吸食，現時每「滴」生的可卡因市價約為五百至七百元，熟的則要八百元至一千一百元不等；每安士約有三十滴，以往每安士熟的可卡因市價要二萬多元，隨供應量增加，現已跌價至一萬六千至一萬七千元。

另外，吸食大麻除被外界俗稱為「隊草」外，娛圈中人亦會稱為「食雞髀」。至於「索K」會稱作「食茄」，較少人知的是，藝人陳慧琳的名字竟被「拖落水」，成為K毒的術語，取其英文名Kelly諧音與「茄」字相近，以及一樣「咁索」。