Sun角度：「養雀」式餵毒 黑幫操控藝人

娛樂圈再爆出吸毒醜聞，揭開藝人背後的黑暗面。其實，藝人吸毒已是圈內半公開的秘密，「毒莊」以不同手法招攬藝人墮入毒海，最常見便是以「養雀仔」方式，先免費供應毒品，待其上癮後便要自費購買，令藝人淪為毒品的奴隸；有「毒莊」甚至製造毒品可減肥、增強性能力和不會上癮的假象，逐步蠶食藝人的金錢以至靈魂。娛圈毒友為了換取毒品更不惜女賣淫、男從事非法勾當，甚至有人甘願淪為拆家，投身毒海，無法自拔。

黑社會入侵娛樂圈，早於九十年代初便曾觸發三百多名本港藝人發起全球首個藝人反暴力大遊行，成為國際新聞；其實魔爪從未離開，黑社會更不斷透過供應毒品操控藝人。「不論形象狂野嘅有（吸毒）、形象幾健康嘅都有（吸毒），睇樣估唔到！」一名熟悉娛圈的江湖中人透露，藝海浮沉了不少「毒星」，他更大爆圈內其中一名主要毒品拆家是一名藝人的兄長，由於該藝人的知名度頗高，令「幫襯」毒兄娛圈中人吸得安心。

設會員制開P歎毒

毒販更會千方百計「氹」藝人「落疊」，最常見是使出「養雀仔」招數：「初頭咪免費畀佢囉，等佢食多幾次上咗癮，再嚟就會話『你成日食，我都無咁多貨喎，不如介紹個friend畀你，直接問佢攞貨啦』，之後佢就自然要畀錢買囉！」

此外，亦有藝人因承受極大壓力及時刻要保持「完美」身形，毒販會覷準機會「落重藥」標榜吸毒可減肥、增強性能力等假象，更聲稱部分毒物能「極速回魂」且「唔會上癮」。不少藝人受不住哄騙「試食」，惟沉迷後已恨錯難返。更驚人的是，有藝人染上毒癮之餘，甚至淪為「拆家」：「肥水不流別人田，自己食開，咪拆埋畀啲friend囉。為了換取毒品，以前曾經有女星賣淫，男藝人就做啲非法勾當。」「毒莊」又會派人在藝人愛蒲的酒吧、Disco向目標「派貨」，甚至「送外賣」速遞毒品。

一名曾接觸毒品的藝人坦言，毒品幾乎從四方八面湧至，圈內圈外都有，「我幾乎咩（毒品）都食過。」該藝人謂，當時因為覺得「毒品唔係毒藥，吸完唔會死」，加上「食少少，玩音樂會好feel啲」，所以開始吸毒High丸仔，就算無人兜售，上癮後自己也會周圍搵門路買貨。該名已迷途知返的藝人忠告，他因為吸毒付出了很大的代價：「食嗰刻係好玩，但有後遺症，依家記性差咗同蠢咗。」

「我哋好容易識到好多人，人哋識我哋仲易，江湖人士或『莊家』都好易埋到身，喺酒吧或K場會識到專門賣毒品嘅人，一個介紹一個。」另一名同是曾經墮入毒海的藝人更透露，吸毒好似打機，有「升呢」過程：「開頭當係去酒吧消遣飲酒咁，成班人柴娃娃咁玩，有得食（毒品）咪一齊食囉，後來就會升level，好似有啲人朝朝起身要飲酒咁，最高班就係返屋企打針，自己喺屋企食。」

娛圈亦盛行開P集體歎毒，警方消息稱：「佢哋會成班人圍埋，揸住支混咗熟可卡因嘅煙，你吸完一啖，就傳畀第二個，跟住飲啖酒，好似好high、好型咁。」但為避警方耳目，吸毒藝人通常會在設有會員制的「鐵竇」開P，只招呼熟客，稍為「生面口」都謝絕招待，免有臥底混入，一網成擒。

連鎖傳播擴大毒網

而可卡因和大麻可謂是娛圈中人的至愛毒品，因為索K及食丸仔個人會好迷糊，但High可卡因同大麻仍會有三分醒，不少藝人貪其「回魂」快，食完「埋位」拍攝都無問題，「可卡因係佢哋嘅『主菜』、大麻就係『tea』或甜品，多數人會混入煙裏面食，有型又唔礙眼，『竹升』就鍾意『生食』可卡因。」

江湖中人續指，可卡因和大麻純度高，感覺亦較高檔，可卡因更有生、熟之分，生的要放在枱上，用卡一間間用鼻索，過程較麻煩和張揚；熟則是已經以梳打粉加工，然後加入香煙內吸食。吸毒歪風在娛圈中一傳十、十傳百，黑社會毒網亦愈擴愈大。