政情：搞搞政：黑英借古諷孫公

天文台前台長林超英對教育局一刀切縮班政策好不滿，早排不斷重炮批評教育局局長孫明揚，仲揚言不惜法庭見。復活節期間，黑英放下心頭火，去咗潮州遊玩，參觀過韓愈古祠，日前就喺網誌上發功，好感慨咁大談為官之道，講嘅雖然係韓愈，但聽落就好似寸緊現代嘅高官，到底佢係鑑古而知今吖，定係借古諷今呢？

黑英透露，佢早前參觀過韓文公祠，並因而大受感動。佢話，韓愈管治潮州雖然只有短短八個月，但就贏得潮州人千幾年嘅尊敬，佢最欣賞韓文公喺潮州嘅治績就係成立「州學」，幫助潮州人以教育脫離落後，仲捐出自己嘅俸祿資助學生膳食，為潮州建立起好學崇文嘅風氣。

係人都知，韓愈官途不暢，去潮州都係被貶，但黑英就好欣賞韓愈嘅豁達、積極，完全冇因仕途被打擊而沮喪，反而用心盡意為地方辦事。佢仲話，好官不管自身嘅際遇如何，都要以人民嘅利益為重，盡力而為。有冇借古諷今﹖大家自己品味吓啦。