政情：葉劉為冇咗杯茶垂淚
做過保安局局長嘅新民黨主席葉劉淑儀曾經統領數以萬計男子漢，一向畀人硬淨嘅感覺，即使當年推銷二十三條孭上唔少罵名，甚至畀人圍困座駕，佢都一副氣定神閒嘅樣，點知，葉劉卻會因為咗一杯奶茶而掉眼淚！
葉劉喺佢嘅社交網站透露，鄰近佢灣仔辦事處嘅一間茶餐廳尋日休業，據講係頂唔住通脹、加租同最低工資三大壓力，尋日葉劉就特登約埋匯賢智庫嘅同學仔去茶餐廳食「最後午餐」，除咗叫餐廳招牌菜之外，仲叫咗帶有強烈寓意、堪稱「預算案革命」標誌嘅粟米斑塊飯，而一向硬淨嘅葉劉忽然眼淺，竟然對住杯奶茶淚灑當場。
葉劉解釋，佢不時會幫襯呢間餐廳，又會同老闆娘傾吓閒偈，順便諮詢吓佢哋對政府各項政策嘅意見，稱得上係民意溫度計。
葉劉忽然對住杯奶茶喊，唔知有冇嚇親班同學仔呢？