政情：鄭志剛進軍荷里活影業
新世界集團主席鄭裕彤長孫鄭志剛（Adrain）揸旗嘅新世界策略投資有限公司，最近斥資四千五百萬美元（三億五千一百萬港元）入股荷里活片商Legendary Pictures，Adrain唔通有意進身影業大亨？
呢間影業公司近排手緊，去年九月已經售出百分之三點三股份畀本港上市公司橙天嘉禾娛樂，籌得一億九千五百萬港元。按此推算，今次Adrain所佔股份不足百分之六，未算係大股東。Adrain接受外電訪問時證實此事，話入股對新世界嘅百貨零售業務推廣好有幫助，尤其當有品牌需要宣傳時，更加如虎添翼。
據悉，新世界策略投資公司年年要投資三十億元，所以搵合適嘅投資項目都幾頭痛。
新世界集團主席鄭裕彤長孫鄭志剛（Adrain）