政情：搞搞政：五星戰隊轟邱騰華擴核

香港毗鄰大亞灣核電站，日本核事故搞到香港人心惶惶，尋日立法會討論核電問題時，就有約五十個團體去表達意見，唔少團體嘅名稱都好有創意、好鬼馬，包括青年團體「五金金星戰隊」、「高燈反核組」甚至「高官腦細胞核異變監察組」等，佢哋仲炮口一致對準環境局局長邱騰華，批評政府對核電死心不息，唔顧港人感愛。

「五星戰隊」嘅代表發言時，言論亦好配合佢哋嘅名稱，隊員鄧建華話：「卡通片入面係怪獸襲地球，現實中破壞地球嗰個係環境局，應該叫做『破壞環境局』！如果有核災難係咪邱局長拯救我哋？」要求局長即時擱置擴核。另一個「高燈反核組」嘅代表又自稱自己係精神領袖；「關注地球氣候及環保議題先鋒小隊」嘅代表就自稱隊長……

雖然佢哋名目古怪，習慣咗死板框框條條嘅高官同議員並冇真係稱呼佢哋做「隊長」、「精神領袖」，不過，一場激辯下，立法會議事廳都多咗唔少另類語言。