政情：鄭大班久休復出氣色佳
本港首隻人民幣計價新股兼全球首隻人民幣計價房地產信託基金（REIT）匯賢尋日掛牌，上市儀式冠蓋雲集，本地財經界重量級人物比比皆是，就連久未露面嘅滙控執董鄭海泉，都親身撐場，佢笑容滿面、氣色甚佳，大家似乎唔使擔心佢依家嘅健康狀況。
滙豐有份參與匯賢嘅上市工作，鄭大班亦係匯賢管理人匯賢房託嘅獨立非執董，尋日撐場可以話係雙重身份，只見佢一直同其他賓架及匯賢管理層交流，忙到唔得閒打牙骹。
除咗鄭大班外，證監會主席方正、港交所主席夏佳理同行政總裁李小加，亦有份見證呢個首隻以人民幣計價新股面世嘅大日子。