政情：環遊大半個地球周一鑊潛水功一流

內地孕婦來港產子一事鬧到滿城風雨，食物及衞生局局長周一鑊日前同公私營醫療界代表會面後，係威係勢咁宣布咗七招後，隔日即刻丟低個燙手山芋，匆匆飛往南美出差。政府憲報尋日披露，佢由尋晚至下月十七號止離港，一去就離岸三個禮拜，拋低產科炸彈同公立醫院醫護人員怒潮等蘇州屎畀副局長梁卓偉。難怪有人話，一個副局長嘅仕途如何，非常視乎佢跟着邊個老細，周一鑊咁叻潛水，副手想好過都難啦！

去南美考察食安

政府尋日發新聞稿，話周一鑊將喺後日起去南美出差兩個禮拜，先到加拿大到訪當地嘅醫療機構同食物技術中心，再轉往智利同巴西，睇吓當地點培殖三文魚同家禽，最後仲會跨越成個大西洋，到瑞士日內瓦出席世界衞生大會，順便探吓世衞總幹事陳馮富珍。若果周一鑊出發時係向太平洋方向飛，佢咁嘅行程幾乎等同環遊世界一周，淨係計機票，呢次出差唔知又要使納稅人幾多公帑嘞。

周一鑊話，由於日本爆發核危機，內地食品又多番出問題，所以佢希望去南美考察，增加入口當地食物；又話相比起南亞同非洲等市場，南美嘅食物安全做得好啲，係一個可以發掘嘅市場喎。

查實依家令港人最不安嘅，莫過於內地層出不窮嘅山寨食品，嗰啲會甩色嘅黑芝麻、像真度極高嘅雞蛋，極之容易流入本港，市民中招可謂話咁易；相反，有冇智利三文魚或巴西雞翼食對港人嚟講反而係其次。周一鑊咁鍾意出差，點解要遠赴南美，而唔返內地處理好呢啲急切問題先呢？嚟緊本港無論係針對內地孕婦來港產子嘅爭拗，抑或係有關公立醫院醫生流失、護士人手不足嘅問題都咁嚴峻，梁卓偉真係要自求多福喇。