政情：丁世民唔再日瞓三粒鐘
丁世民（Simon）幾個月前離開敦沛期貨，休息一段時間後，五月三號會投身中資機構廣發控股（香港）嘅期貨部做副總經理，牌頭唔細㗎！佢仲話：「自己喺歐洲期貨交易所工作時，廣發已經搵我幫手，估唔到兜兜轉轉多年，彼此之間嘅緣分今日先到。」
其實Simon之前身體唔太舒服，睇過醫生後一直喺屋企休養。佢一向事業心重，日日掛住做嘢，唔捱出病就出奇喇。「以前我日日瞓三個鐘，成日擔心市況走勢，卒之早前身體發出警號喇，二月份時真係病得好厲害。不過，廣發期貨部盤房啲兄弟好幫得手，有大家幫輕吓，我都唔會太辛苦嘅。」
廣發控股係內地十大證券行之一，聽聞Simon加盟後會幫公司研發兩隻新基金，之後又會不時返內地公幹，睇嚟呢個工作狂即將又要頻頻撲撲嘞！
丁世民加盟廣發控股後會研發兩隻新基金。（資料圖片）