政情：發叔喝停撐村屋示威
一班新界原居民原本計劃趁今日屋宇署署長出席元朗區議會會議，就村民僭建問題示威，睇嚟可能又爆大鑊，而喺示威前夕，身兼行政會議成員嘅新界鄉議局主席劉皇發喝停咗個行動。
元朗十八鄉鄉事會主席梁福元話，佢哋要求當局容許保留村屋喺第四層僭建玻璃屋，但發叔就要求居民唔好示威，畀鄉議局同政府繼續商討，所以佢哋決定取消行動。
老實講，發叔早前被揭發向行會漏報利益搞到周身蟻，跟住競逐村代表選舉又遇到倒佢嘅浪潮，遲啲競逐連任新界鄉議局主席又存在暗湧，點知一波未平一波又起，喺呢段時間又爆出審計署批評村屋僭建問題嚴重，而原居民就話要保留傳統權益，令官民又處於對立面，呢次咁大鑊都唔知佢點擺平。