政情：姚明揸股唔識高位套現

內地上市公司披露二○一○年年報接近尾聲，各路名人身家升定跌、分咗幾多花紅都一一曝光。好似NBA巨星「移動長城」姚明咁，佢揸住嘅合眾思壯，股價坐完一輪過山車之後跌到殘晒，高低價大拿拿差成五千萬人仔呀！

有姚明入股嘅合眾思壯舊年上市，但上市第一年嘅業績並唔靚。合眾思壯嘅股價曾經飆升至113.98元，點諗到兩個月之後就被腰斬，到尋日只剩43.22元。計番上嚟，由高位回落嘅跌幅高達62%，股東姚明嘅股票原本值成八千萬，依家連三千萬都冇。

內地股市兩位大阿哥尉文淵同闞治東，因為華銳風電上市後跌穿招股價，到依家未翻身，佢哋嘅身家合計蒸發咗21億元。而一年前曾登上內地首富榜嘅海普瑞掌門人李鋰夫婦，亦因為業績突然變臉，股價急跌，佢哋嘅身家都縮水咗115.8億咁多。

至於一向以明星股東多而聞名嘅華誼兄弟，舊年都好熱鬧，除咗阿里巴巴老細馬雲減持之外，原來大導演馮小剛都有套現，至少減持184.8萬股，袋咗超過4,622萬人仔。