政情：莊偉茵半日試40道菜
做邊份工都有辣有唔辣，好似國泰航空企業事務董事莊偉茵，工作範圍包括四圍飛兼試食飛機餐，聽落好似好吸引，但有時都幾辛苦。為咗幫乘客精挑細選最好嘅飛機餐，佢試過最高紀錄喺一個下晝試食四十幾道菜，無論中西菜式、甜酸苦辣甘都試勻，結果試到條脷麻木咗。
脷麻事小，佢最擔心係食大咗個肚腩，好彩佢生得高，肥咗少少都唔多覺，但為咗keep fit，佢幾忙都好，一個禮拜堅持要跑三日步。
話口未完，佢原定尋日下晝要出發去西雅圖接新飛機返港，但出發前都特登同幾個食家喺尖沙咀The Mira酒店試菜，事關嚟緊國泰會同美麗華集團合作，喺五月一號同七月三十一號喺美麗華集團旗下嘅八間高級餐館，為國泰乘客提供超過九十款餐單喎！
為免食出個大肚腩，莊偉茵堅持一個禮拜跑三日步。