政情：T Party玩激進飛起富貴黨

雖然富貴黨呢排已開始密密落區做嘢，連黨徽都改埋，希望可以洗頹氣，重新出發，但好景不常，幾個前黨員尋日自立門戶，成立一個未有中文名嘅政黨「T Party」，打正旗號反對最低工資同埋佢哋口中不勞而獲、不斷蠶食公帑嘅「蝗蟲」，好明顯就係嫌富貴黨唔夠激。搞唔搞得起？真係要睇過至知。

T Party係點解呢？據一班成員所講，「T」代表True（真誠）、Tradition（傳統）、Tax payer（納稅人）同T細胞。成員之一馮德聰話富貴黨確係較保守，而今次決心自立門戶，全因五月一號最低工資實施在即，希望可以盡快企出嚟，爭取政府暫緩呢個政策喎。今次退出富貴黨嘅有五個人，當中較為人熟悉嘅只有現任區議員林翠蓮。

年底區選爭飯食

馮德聰話組黨當然要積極參選，只不過佢哋並唔係每事都向選票看，佢哋有某啲理念同主張未必得到大部分選民歡心，但即使咁都唔緊要，因為佢哋相信有好多選民都希望見到一啲硬骨頭嘅政黨喎。林翠蓮亦話佢哋人數依家雖然少少哋得五個，但已接觸過好多人，希望佢哋支持呢個咁另類嘅新政黨，更揚言當中好幾位都有一定知名度，不時會出現喺傳媒報道嘅添。

據初步評估，佢哋揚言十一月區議會選舉可派人喺二十七個區參選。佢哋尋日仲特別強調，宣言中所講嘅蝗蟲唔係指新移民，而係好似社民連立法會議員梁國雄呢啲月入幾萬仲霸住公屋嘅人，同嗰啲讀飽書但唔搵工、靠綜援搞社運嘅人。

又有黨員退出，兼喺年底區選爭飯食，唔知榮譽主席田北俊會唔會嬲到七竅出煙呢？林翠蓮強調喺富貴黨十幾年，離開都唔想出惡言，佢哋成立前一晚見過田少，據講田少見大家去意已決，亦冇出聲挽留喎。