孫太力撐：生理指標正常

【本報訊】孫明揚患腎病消息傳出後，太太鍾小芬表現樂觀，並力撐丈夫繼續履行局長職責，她說：「佢（孫明揚）仲好健康，各方面生理指標正常。」她估計，孫患腎衰竭與他本身患糖尿病有關，但指孫「好有鬥志」，現時無需特別戒口，只需維持飲食清淡，現時孫晚上需要自行插喉「洗肚」，程序簡單。

一樣瞓埋一張床

孫太昨日接受本報訪問時，繼續貫徹其開朗性格，明言孫公的病「有得醫」，自己不會太擔心，而全家更會總動員力撐孫公。她又笑言，除了自己要比從前更「硬淨」外，孫公患病後一切都無改變：「我咪一樣同佢一間房，一樣瞓埋同一張床！」又自言「我唔可以畀家人睇到我唔舒服……我心情唔好嘅話，會影響家人同孫公。如果我自己都有事嘅話，邊個照顧佢？」

孫明揚患病消息昨日曝光，他與太太中午在中環一間中菜館共晉午餐，孫太心情亦似乎未受影響，下午如常與朋友到中環飲下午茶。孫太相信，目前孫的病情不會影響其日常工作，暫時毋須辭職，又說他沒有向曾蔭權請辭，「佢做唔到自然會辭㗎啦。」她表示，孫公的病「有得醫」，故自己不會太擔心，又樂觀地說：「上天唔會畀一個人咁perfect（完美），總有少少問題嘅，呢個都唔係咩大問題啫。」又說孫明揚現時的生理指標例如膽固醇等，比她還正常。