踩單車做善事，投身其中嘅有單車名將黃金寶、藝人鄭伊健同合和太子爺胡文新等，尋日佢哋一齊喺單車場上顯身手，為電視台錄影一個慈善節目。阿寶技藝精湛唔使講啦，連鍾意冰球嘅胡文新都有板有眼，鄭伊健喺高手身邊並冇被比下去。
鄭伊健話，佢平時好少踩「鑊形」單車場，唔知係咪講佢好多時都喺平地踩呢？問佢點解唔着單車褲，佢話：「我呢條fashion少少啫！因為我大腿肌肉發達啲！」佢仲透露，入選呢個踩單車行善嘅節目，同佢之前被影到與女友蒙嘉慧喺歐洲踩單車有關。
右起：黃金寶、鄭伊健同胡文新一齊踩單車做善事。
