政情：陳智思話遊學如留學

遊學團近年愈趨普及，每逢暑假來臨，唔少家長都會擲千金為子女報名參加呢啲團，早前關愛基金宣布今年援助計劃時，就宣布資助三千蚊畀清貧學生參加遊學團嘅建議，雖然有聲音認為資助遊學團算唔上急人所急，甚至小恩小惠，但社聯主席陳智思（Bernard）就認為，遊學係好好嘅磨練機會，仲好難忘赴美國留學嘅經歷。

Bernard話遊學在外，旨在放眼世界，去遠或去近並唔重要。佢仲話，自己後生時潮流未有遊學呢個概念，不過屋企人送咗佢去美國讀書，諗番轉頭，雖然因為隻身在外，喺陌生嘅地方捱過唔少鹹苦，但佢深深明白，自己亦因此成長唔少，或者呢啲就係佢認同嘅磨練啩！

古語都有話，讀萬卷書不如行萬里路吖嘛，Bernard行過萬里路，梗係明白畀清貧學生多啲機會開吓眼界，對佢哋將來一定有正面作用。佢又話，遊學亦可以睇到世界嘅另一面，譬如外國都有差嘅一面，見識多啲，啲同學仔可能更鍾意香港㗎。