政情：馬化騰搞基金幫員工買樓

股價屢創新高嘅騰訊近日三喜臨門，一係佢哋起訴奇虎360隱私保護器侵權案終於有結果，法院判騰訊勝訴，奇虎360損害騰訊商業信譽，要連續三十日刊登公開道歉兼賠人民幣四十萬元。二就係呢個好消息傳嚟時，公司主席馬化騰宣布員工加薪9%，仲成立基金免息借錢畀員工買樓。連串好消息下，第三樣就係騰訊股價喺尋日跌市仍然升咗2.4%。

呢單官司源自舊年九月，奇虎360公開指摘騰訊QQ2010軟件掃描用戶硬盤侵犯用戶私隱，之後奇虎就推出360私隱保護器，騰訊被激到要求用戶喺QQ同360之間兩選一，引發網絡大戰，騰訊之後起訴奇虎360不正當競爭，要求佢哋賠四百萬元，仲要360公司連續三個月道歉。尋日法院嘅宣判終為事件畫上句號。

馬化騰贏咗官司，亦親自發e貓畀各大員工，話知道近日CPI同樓價高企影響生活質素，管理層們感同身受，為咗員工「快樂工作、安居樂業」，除咗員工加薪9%外，仲成立「騰訊安居基金」，提供十億元人民幣，免息貸款幫員工買樓，只要係首次置業嘅員工就有資格申請。