政情：馬世民歧視女性認衰

今時今日嘅社會講求兩性平等、有能力者居之，所以唔少大機構高層都係女士。啱啱做全球大型商品交易所嘉可能（Glencore）主席嘅前和黃大班馬世民竟然唔係咁睇，早前公開話女士喺工作上嘅野心及唔上男士，仲話女士想湊仔多過入董事局，結果咪要為言論道歉囉﹗

馬世民話，請女士做嘢有風險，因女士都希望結婚生仔，加上孕婦有九個月產假，令到女士們喺職場上嘅能力有限喎。

馬世民言論一出，當然惹嚟各界喪鬧，英國商務大臣祈維信（Vince Cable）就狠批，馬世民嘅言論係「難以置信咁原始（unbelievably primitive）」。為咗挽回聲譽，馬世民拿拿聲道歉話自己百分百致力於平等機會，仲補鑊話如果企業未能處理女性喺各階層參與度低嘅問題，就會有競爭上嘅劣勢。事實勝於雄辯，據英國《星期日電訊報》講，嘉可能並冇女董事，睇嚟馬世民要做吓嘢喇。