政情：踢爆村屋僭建鄉事派兇黎年

申訴專員黎年早前主動調查新界村屋嘅監管，踢爆屋宇署、地政總署對違規興建嘅村屋軟弱無力，起好就費事理，鄉事派當晚即高調回應，仲誓言要反擊申訴署添。有新界原居民話，政府長期搵佢哋出氣，今次仲要拆屋，實在忍無可忍，誓言聽日拉大隊衝上元朗地政總署示威，仲警告唔排除以人海戰術圍攻政府總部。嘩！黎年今次會唔會點火反被火燒㗎？

明地政署示威

唔少新界原居民對申訴專員要求嚴打僭建感到極大不滿，認為係畀人踩到上心口，所以聽日就會有幾百個六鄉村民打頭陣，去地政總署示威抗議，希望政府盡早修例豁免清拆，如果政府夾硬嚟要做嘢，佢哋都會發動支持者反攻。

相關人士仲警告，如果政府拆屋，佢哋就拆番政府骨喎！歷史話畀我哋知，凡係牽涉原居民利益嘅事，都可以搞到好大鑊。好似○一年環保署否決九鐵落馬洲支線貫穿塱原濕地，但冇同時提出賠償方案，搞到時任村長嘅簡炳墀聲言要「撒石灰」趕蟲。而○六年政府沒收新界居民嘅私養家禽，幾十名居民代表就齊齊衝上禮賓府放雞。可見新界人出手，真係一啲都唔簡單！

黎年今次主動調查村屋興建，真係揭開咗一個存在太耐嘅老問題封口，畀黎年點名嘅兩大部門唔可以唔回應，如果強硬執法，問題勢必更大。家吓鄉事勢力反應咁大，擺明就係對政府強硬執法甚至強硬推行鄉村政策嘅警告，事件涉及好多人嘅切身利益，鄉事派反應有幾激？家吓真係冇人知，一句講晒，黎年今次真係點火容易熄火難。