政情：搞搞政：黑英食字反縮班

尋日係復活節假期最後一日，但天文台前台長「黑英」林超英都唔畀教育局局長孫明揚好過，喺網誌繼續咬住佢唔放。

身兼英皇書院同學會會長嘅黑英話，孫公早前喺有關縮班事宜嘅覆函中提到：「章程列明校管會聽從教育局常任秘書長的指示……」但佢遍尋不獲，只係喺章程中搵到，佢翻譯為：「校管會須為學校的表現向常任秘書長……負責。」

佢話當中嘅「負責」係特指學校嘅「表現」，係有範圍嘅，而唔係漫無邊際嘅，如果將呢段章程理解成所有法團校董會須聽從常秘嘅任何指示，恐怕辦學團體更唔願意為屬下學校成立法團校董會。佢仲忠告教育局喺處理英皇單一事件時，切勿貪一時方便曲解條例，否則會引起意想不到嘅連鎖後遺症。

黑英擺明係警告孫公咪再扭曲法例解釋啦，事關佢早前講過唔排除會就縮班提出司法覆核吖嘛！

大家可能覺得奇怪，黑英引述嗰段章程出現嘅「……」係乜呢？佢自爆其實係「辦學團體」，官中嘅辦學團體就係政府，咁即係要校管會向政府負責，佢專登省略咗，都係扭曲緊條例啫！咁咪即係有口話人冇口話自己囉！