政情：梁福元輪隊執熱煎堆？
之前我哋講過，據聞現時懸空咗嘅元朗區議會副主席之位，引嚟三位鄉事委員會主席垂涎，但有鄉事中人為免出現自己人打自己人嘅情況，遂建議喺新界鄉議局主席劉皇發見證下，大家抽籤解決。說時遲那時快，尋日我哋聽聞已經傾掂，唔使抽籤，仲決定由十八鄉鄉委會主席梁福元做。究竟係乜嘢一回事呢？
我哋問過屏山鄉鄉委會主席曾樹和，佢話的確係佢建議抽籤嘅，不過既然個個都唔想抽籤，況且考慮到呢屆區會副主席任期只有幾個月，為咗大局着想、免傷新界人和氣，所以會按照元朗六鄉輪流做活動籌委會主席嘅習慣，由十八鄉嘅梁福元做埋區會副主席。咁區會換屆後又點呢？佢話到時先算啦。
不過，當事人梁福元話梗係唔係輪住做啦，若果協商唔到就投票決定，所以未到最後一刻都未知o架。
梁福元係咪做元朗區議會副主席，後日有分曉。