政情：譚Sir寸社記低智玩埋孫女

政務司司長唐唐日前出席建仔搞嘅辛亥革命交流團誓師禮時，畀社民連（社記）踩場抗議。班示威者好「一視同仁」，一方面喪鬧唐唐冇資格講孫中山思想，亦不忘鬧埋主辦單位建仔「無恥」，搞到黨主席譚耀宗極為面懵。譚Sir其後喺鏡頭前嚴詞狠批社記，斥佢哋搞事嘅行為，令佢諗起佢嗰位同樣好鍾意成日大嗌嘅兩歲孫女，又寸社記班示威者「心智未成熟」。

譚Sir話音剛落地，即時引起社會各界激辯。當日有份示威嘅社記立法會議員「長毛」梁國雄尋日就話，若果譚Sir將示威者嘅叫喊聲等同佢孫女嘅「大嗌」，咁佢呢位爺爺絕對可以代表到中國家長嗰種專制嘞，事關佢竟然可以對孫女嘅叫聲充耳不聞，又話：「如果一個家長聽到小朋友大嗌都唔理，係會車毀人亡㗎！」

有網民更惡搞譚Sir，用佢個樣設計張海報，再配以「乖孫，爺爺同你玩，記住唔好亂咁叫呀」嘅標語，認真抵死。亦有網民喺facebook開設群組，「競猜」譚Sir嘅孫女究竟向佢「大嗌」啲乜。唔少社記成員更坦言，孫女咁細個已經識好似社記咁同譚Sir搞對抗，真係大有前途，社記應盡早拉佢入黨。

弱勢政府 好帶挈

社記副主席吳文遠尋日喺大氣電波繼續衝住譚Sir而嚟，批評真正心智未成熟嘅，係是非不分嘅建仔至真，又話佢哋日前採取示威方式抗議，全因建仔唔肯聽意見喎。

不過，其實講到尾，譚Sir今次畀班網民惡搞，全因呢個弱勢政府好帶挈，試問若果佢哋係做得好嘅，社會嘅反對聲音又點會咁強？示威者又使乜個個禮拜都要搵個高官嚟狙擊呢？睇嚟以後啲政黨同團體搞公眾場合時，都係唔好搵高官撐場主禮喇，皆因佢哋嘅風頭實會畀屆時被衝擊嘅高官搶晒，到時就喊都無謂啦！