SUN世代：做個快樂CEO

曾智明（Ricky）可能是世上最快樂的CEO，他性格極度樂觀，曾遇上視網膜脫落、被車撞倒等橫禍，他一笑置之；曾做過「童工」、捱幾個星期麵包等艱辛事，他從不覺苦；身為叱咤政經界的曾憲梓之子，繼承父業出任行政總裁，他未感壓力。Ricky有自己一套做人哲學：「最緊要做好自己唔同崗位嘅本分，開開心心！」

訪問當天，Ricky的午餐是從茶餐廳外賣的味菜牛肉飯，他吃得津津有味。你或會奇怪，為何這位上市公司CEO會吃得如此平民？原來他自小已捱慣。父親曾憲梓白手興家，回想兒時家族生意仍是小本經營，他已擔當「童工」：「當時金利來仲係家庭式工業，喺油麻地平安大廈，讀小學嗰陣就幫手生產領呔，九歲已經去百貨公司叫賣，好開心！」

Ricky十四歲那年，家族生意擴展到新加坡，他跟隨前去，在當地入讀中學，與一位經理同住。他雖然身為太子爺，但卻不獲厚待，沒有傭人可使喚：「星期一至五放學返屋企就要煮飯，星期六、日洗屋當娛樂，好享受嗰段日子！」時光倒流憶述往事，Ricky一臉回味。

Ricky二十二歲時正式加入公司，負責歐洲各地的服裝採購工作，當中有不少難忘經歷：「第一次去歐洲採購，逐間廠行。當時食唔慣嗰度啲嘢，三個幾星期日日捱麵包，試過一次偷偷哋喺酒店度煮公仔麵同煲番茄薯仔湯，差啲畀酒店職員發現，好似做賊咁！哈哈！不過訂到靚嘅貨，好有滿足感，咩都抵番晒！」

翌年，Ricky被派往台灣，專責當地業務，那時發生了一宗驚心動魄的意外：「我喺屋企急住出門口返工，撞碎咗道玻璃門，即刻成身都係血，啲玻璃插咗入手、大髀同眼角，入醫院縫咗二十一針！醫生不停叮囑我傷口唔好濕水，點知一行出醫院門口就傾盆大雨，變咗落湯雞，哈哈哈哈！」記者聽罷不禁抹一把汗，他卻笑聲如雷。

最緊要做好本分

除了意外浴血，Ricky還有其他驚險經歷：六歲那年，他獨自上學途中，一輛風馳電掣的小巴衝出來，他被撞至飛彈開去，卻奇迹地沒有受傷；於二十八歲時，他突然視網膜脫落，原因不明，至今視力仍受影響，他卻笑說：「睇唔清唔緊要呀！睇嘢係用個心睇o架嘛，心水清就得啦！」

樂觀的Ricky，現時擔任家業接班人，肩起重任，卻未曾感到一絲壓力。活得如此快樂，全因Ricky有自己一套哲學：「做人最緊要開開心心，做好自己本分！我嘅人生目標係要努力做好公司嘅CEO、父母嘅仔、屋企嘅一家之主、仲有唔同公職嘅責任！」

Ricky's Profile

婚姻狀況：已婚，育有一子一女。

現職：金利來集團副主席兼行政總裁

部分公職：第十一屆全國政協委員、第十一屆廣州市政協委員、中華全國工商業聯合會執行委員、廣州外商投資企業商會會長、暨南大學校董、香港中華總商會常務會董及青年委員會主席、香港廣東社團總會副主席、九龍社團聯會副會長