政情：搞搞政：陳維安搵重建四川邀功

早前都講過，教育局副局長陳維安上任三年做乜都衰，例如電子書、課本同教材分拆都搞到一鑊泡，唯一成績可能要喺國內四川至見到。

四川大地震發生至今快三年，陳維安尋日喺教育局網頁專欄《局中人語》，抒發過去兩年幾探訪四川災區嘅感受，特別提到○八年九月曾經到四川映秀鎮一條公路，嗰度地面相比以前足足下降咗十層樓嘅高度，然後又有山泥傾瀉，新土掩蓋舊土，陳維安特別唏噓，嘆句「到底在那三十公尺下的舊土裏埋了多少人和事，我不得而知」。

佢仲話曾經到過多間學校參觀，既感慨學校倒塌瘡痍滿目，又感恩重建令到當地小朋友重現笑顏。佢話未來兩個月會再訪問四川，今年更加係教育局喺四川重建上嘅收成年，基本上全部六十九個協助重建項目都可以趕及喺今年完成，絕大部分可以投入使用。咦！咁唔知同香港家長最切身嘅教科書書價項目，陳維安又幾時至有貨交呢？