政情：關愛基金吸水有困難

舊年十月施政報告公布成立百億元關愛基金，聲稱會由政府同商界各出資五十億元。半年過去，政府一直唔肯公布實際籌款數字，坊間一直揣測根本就籌唔夠數，尋日仲爆出政府退而求其次。

政府連搞慈善都神神秘秘，可見佢哋如今係何等虛怯。名義上負責管理關愛基金嘅督導委員會早幾日開過會，身為委員之一嘅譚耀宗話，的確有委員喺會議上要求政府提交籌款進展資料，但官員支吾以對，只係話會等到下個月六號，即係向立法會財務委員會申請五十億元撥款時至會詳細交代喎。

關愛基金運作唔透明、當班委員冇到，本來就不知所謂，但更奇怪嘅係，政府當日喺會議上更加宣布，基金商界籌捐部分會加入「認捐額」制度，承諾捐錢嘅人唔需要即時畀晒筆錢，只要喺三年內完成就搞掂，希望藉此吸引更多商界捐款。睇嚟關愛基金嘅吸水力好有限喎，到底籌夠商界嗰五十億元未？下個月六號自有分曉。