政情：肥彭入主BBC遭狂插

彭定康早前爭贏英國廣播公司（BBC）信託主席呢份「超級筍工」，下個月就會正式上任，以為肥彭從此可以坐定粒六，喺BBC呼風喚雨啦，點知未必會咁順利，皆因佢未返工已經受到唔少質疑，認為佢唔適合做主席嘅言論不絕於耳，有人擔心佢保守黨黨魁嘅背景會有政治偏見，尋日仲有評論指出，肥彭係虔誠嘅天主教徒，擔心BBC將來一旦面對宗教爭拗嘅報道，有最終決定權嘅肥彭可能會宗教至上，喪失客觀判斷，分分鐘影響埋新聞自由。

報道指出，肥彭信奉天主教，經常都為天主教講好說話，好似上年教宗本篤十六世訪英，當地有市民趁機上街示威抗議有天主教會虐待兒童，肥彭就即刻跳出嚟，話如果將所有事情計落教宗頭上，係缺乏理性同極度小器嘅表現。報道又指，BBC近年出現蔑視基督教嘅言論已經愈嚟愈多，擔心肥彭接手後，會更加偏幫天主教。肥彭將來要平息呢啲紛爭，真係好考智慧。