政情：洪為民鬧競爭法諮詢少

菁英會常務副主席Witman洪為民尋日出席一個公開場合時，四圍問在場嘅立法會議員攞有關競爭法嘅文件睇。點解佢忽然咁想溫書？原來本身喺IT界出身嘅Witman，一直透過同界別嘅議員、資訊科技界代表譚偉豪攞料，但點知IT豪退出咗競爭法草案委員會，佢只好四出搵議員借文件嚟睇，希望睇清楚藏於細節嘅魔鬼。

佢認為競爭法一定要立，但就唔使急就章，如果好似依家呢條，油價、跨行業壟斷等嘅就應管唔管，唔應管嘅中小企就通通包攬晒，咁立法嚟都無謂嘞！佢話唔明點解條例同諮詢時出入咁大，又寸爆商務及經濟發展局署理局長蘇錦樑，淨係識得向區議會拉票，真正聽意見就好少。雖然佢覺得呢種政治拉票無可避免，但就覺得政府應該做多啲實事，改善條文內容，咁到時自然得到議員支持，唔使用「農村包圍城市」策略闖關咁肉酸！