政情：公院爆煲何時了 蔡堅要搵人祭旗

公立醫院醫護人員人手流失嚴重爆發嘅怒潮，醫院內外貼滿鬧爆食物及衞生局局長周一鑊嘅海報，仲叫佢下台添！而新一浪嘅抗爭行動，就係班醫護人員貼住「嬲爆」、「喪頹」、「勁灰」貼紙以示不滿。

搞到爆煲，醫學會會長蔡堅尋日喺「城市論壇」上，直斥醫管局啲高層人工加埋獎金高過特首，但問題係呢班高層做嘢冇方向，○三年醫管局用二百萬送走啲醫生（俗稱「肥雞餐」）；○四年多實習醫生，佢哋冇工做，港大畀佢哋一人一萬蚊走去做研究；依家唔夠十年就話唔夠醫生，呢啲負責嘅人要人頭落地。

佢話香港用喺醫療嘅錢愈嚟愈多，有成三百幾億元，係全中國嘅五分一，咁大筆錢可以做好多嘢，但唔係用得其所呢！好似聯合醫院，已經有二千幾個大肚婆，仲要撥人手去將軍澳醫院，點解要開將軍澳醫院先？咪就因為啲區議員嘈、因為啲政治壓力囉。佢仲話醫管局若再唔去反省，請外勞都冇用。

搞醫療產業自打嘴巴

鬧鬧吓，燒埋政府話大力發展醫療產業。佢話政府從來冇做諮詢，簡直係空中樓閣，唔似得泰國嗰邊咁好，甚至可以安排埋坐郵輪，但香港點呢？住一晚酒店都要千幾蚊，根本冇條件做得到，依家連內地孕婦都話唔可以嚟香港生仔，政府話搞醫療產業根本係自打嘴巴。

肥雞餐年代嗰班醫護高層，包括前衞生福利及食物局局長楊永強、醫管局主席梁智鴻、行政總裁何兆煒，全部都落咗台，依蔡堅口中所講，其實係警告緊周一鑊、現任醫管局主席胡定旭同行政總裁梁栢賢，若果公院爆煲問題解決唔到，因住到佢哋人頭落地呀！