政情：台聯電曹興誠入籍星洲

移民可以係人生一個選擇，亦可能係一宗政治事件。近日傳出台灣聯電榮譽董事長曹興誠（圖）放棄咗中華民國戶籍、入籍新加坡嘅消息，台灣媒體嘅報道仲話佢早喺今年一月已經完成咗呢項棄台投星嘅程序。

曹興誠係台灣知名富商，呢次入籍新加坡，佢本人接受當地傳媒訪問時，就講到明同官司有關：「前一陣子要求司法改革，指名道姓批評司法人員，可是這些人現在還在位子上，有很多的權力，所以還是到新加坡比較安靜。」唔講唔知，曹興誠曾經係施明德呼籲出嚟選總統嘅人。移民之後，曹興誠仲講笑咁話自己已經係新加坡人，對於選總統之說：「可以說是一刀兩斷，完全不可能了。」

聯電嘅市值高達一千九百八十七億新台幣，曹興誠用投資移民方式入籍新加坡可以話毫無難度，不過，有傳媒就報道，曹嘅友人透露，佢獲得新加坡總理李顯龍夫婦邀請入籍，仲獲得保證「二○一二年前隨時可入籍」，令呢宗富商轉籍新加坡嘅關注更加「高規格」。