政情：搞搞政：袋巾傑復活節被贈興
預算案宣布大加煙稅後，獲公文袋力撐，引嚟好多煙民不滿。尋日係復活節假期第一日，屢次狙擊公文袋同黨魁梁家傑嘅「稅債票償大聯盟」再度出擊，十幾個成員到袋巾傑嘅樂富橫頭磡邨辦事處，向袋巾傑送上復活節禮物，雖然冇預期中嘅復活蛋，但就有巨型復活蛋賀卡，團體希望公文袋「良心復活」喎！
最搞笑嘅係，大聯盟嘅一班義工，好多睇落好似未夠秤，有人更直認自己唔係煙民。唔係煙民點解要反公文袋呢？大聯盟成員吳健華話，佢哋班義工唔係全部都夠十八歲，但強調全部都係自發嚟做義工幫手喎。現場所見，呢班義工好落力，幫手摷垃圾桶執拾棄置煙盒，收集後以推算私煙嘅比例，尋日執到嘅首四個煙盒，已有一包係免稅煙。
大聯盟話會喺下月二號開記招，總結收集結果，話畀袋巾傑知撐加稅等於撐私煙。